Maiatzaren 10ean egingo dugu Amillubin Udaberriko Festa. Eguna bete-betea dator: goizean bi mahai-inguru izango ditugu, eta arratsaldean mota askotariko emanaldiak.
Dagoeneko, bazkarirako eta arratsaldeko emanaldietarako sarrerak salgai daude. Amillubi proiektua babesteko eta gastuei aurre egiteko, bazkarirako eta arratsaldeko jaialdirakosarrerak salgai jarri ditugu. Bazkarirako txartela 10€ dira, eta arratsaldekorako beste 10€. Umeek arratsalde pasa dohainik izango dute eta bazkaria 7€ren truke.
Erosi garaiz, antolakuntzan biziki eskertuko dizuegu eta!
Edonola ere, proiektu hau herritarra da eta izan nahi du, eta ez dugu prezioa inorentzat oztopoa izaterik nahi. Hala bada, konfiantzaz, idatziguzu koordinazioa@amillubi.eus helbidera, eta moldatuko gara.
Eta oraindik etortzeko edo ez zalantzan bazaude, segidan egunari buruzko xehetasun gehiago:
9.30ongi etorria egin eta segidan honako bi mahai-inguru izango ditugu:
14:30tan Bazkari Agroekologikoa!! Etorkizuneko janaria, ekoizpen duinean oinarrituta egon behar da, eta horren aldeko apustua egin nahi dugu, bertako produktu ekologikoak sustatuz.
16:00tik aurrera kultur emanaldiei bidea irekiko diegu: bakarrizketa, poesia musikatua, musika zuzenean,… kartel dotorea dakarkizue!
Gainera, egun osoan zehar umeen txokoa egongo da, goizean zaintza zerbitzuarekin. Ipuin-kontalariak goxatuko die bazkalostea txikienei.
Eta, Amillubiko materialaz gain, aurten nekazal material eta produktuen bigarren eskuko azoka ere izango dugu.
Apirilaren 13an, oraingoan euripean, bigarren auzo(p)lana egin genuen Amillubin. Dagoeneko udaberrian guztiz murgilduta gauden honetan, ezin izan genien kanpo lanei erantzun, lurra oso bustia zegoelako. Hala ere, bertaratu ginenen artean, aurrekoan geratu ziren lanak amaitu eta beste asko aurreratu genituen, batez ere Udaberriko Festari lotutakoak; ukuilu handia garbitu biltegi bezala erabiltzeko, aterpea itxi mahai-inguruak bertan egiteko eta komun lehorren txokoa atontzen jarraitu. Gainera, momentu batean ateri zegoela aprobetxatuz, inguruak desbrozatzen eta lorategia txukuntzen ibili ginen.
Eguerdi partean, mokadua partekatu ostean, goxo goxo aterpean eseri eta era informalean hitzaldiari ekin genion. Milorriko kideak sendabelarrak biltzeko eta lehortzeko teknika ezberdineni buruzko informazioa partekatu ziguten eta jarraian, Eli Pagolak barazkiak eta frutak lehortzeko Donostialdeko ekoizpen sareko kideen artean egindako eguzki lehortegiaren esperientzia ekarri zigun. A ze tramankulu interesgarria!!
Bukatutakoan, primizia moduan maiatzaren 10ean egingo dugun Udaberriko Festaren egitaraua aurkeztu eta bertaratutako guztien artean argazki eder bat atera genuen!!
Arazo berdinen aurrean, tokian toki irtenbideak asmatzen. Catalunyako esperientzia agroekologikoak ezagutzeko egindako bidaiaren kronikada honakoa.
Apirilaren 4tik 6ra bitartean, Biolur eta Amillubiko 5 kide Catalunyan egon gara bertako proiektu agroekologikoak ezagutu asmoz. Amillubiren etorkizuna definitzeari begira, zein dimentsiotan sakondu nahi genuen definitu genuen aldez aurretik, eta horren arabera zein proiektu bisitatuko genuen erabaki: proiektu kolektiboak eta horien antolakuntza, ekoizpen eta kontsumoa artikulatzeko proiektuak, proiektuetako jabegoa eta forma juridikoa, eta ekoizpenaren antolakuntza.
Horren arabera planifikatu genuen bidaia, eta oso emankorra suertatu zaigu. Segidan, laburpen txiki bat egiten dizuegu.
Ostiralean, 12tarako, Lleida hiriaren baratzegunean ginen. Bertan, eremu nagusia fruitagintza industrialera bideratuta dago, baina horren barruan lur eremu interesgarria aurkitu genuen. Udaleko partzela batean, hainbat proiektu burutzen dituzte, denak ekologikoak. Guk, zehazki, “Viver d’Agricultors de Rufea” bisitatu genuen, bertako udal teknikariarekin. Halaber, “Agrupació de Defensa Vegetal Ecològica de Ponent – Bioponent”eko teknikari bat gurekin egon zen, eta test gune finko eta efimeroei buruz hitz egin zigun. Laburbilduz, erreleboari begira eta test guneei begira hemen ditugun antzeko problematika eta zailtasunak dituzte bertan, eta horri konponbide emateko saiakeretan ari dira. Test gune efimeroen proposamena interesgarri suertatu zitzaigun. Horrelako espazioetan errelebo prozesuetan bidelaguntza egiteari begirako gida metodologikoa ere egina dute. Ziur gaude aurrerantzean ere gakoak eskaini ahalko dizkigula.
Bisita amaitu eta berehala Tarragonarako norabidea hartu genuen. Bidean mokadua egin, Montblanc-en ostatua hartu eta gauzak deskargatu, eta Bràfim herrira joan ginen. Bertan La Brostada Cooperativan elkartu ginen bertako kideekin. 3 ekoizpen proiektu (batek almendra eta olioa ekoizten ditu, beste batek barazkiak, eta azkenak algarrobaren transformazioan dihardu) elkartu dira, kooperatiba forman, eta transformazio gune kolektiboa (obradore kolektiboa) sortu dute. Bertan dendatxoa eta bulegoa dauzkate. Bereziki interesgarria suertatu zitzaigun zein emankorra suertatu zaien proiektu ezberdinen arteko elkarlana. Eta, tira, algarroba krema eta bertako almendrek ere konkistatu gintuzten.
Bràfimen bertan izan genuen gero eztabaidarako tartea, CoopCampek antolatutako “Producció, consum i relleu agrari” jardunaldiaren baitan. Lehenik, Biolur aurkeztu genien. Ekoizpen eta kontsumoaren arteko lanketa eta sareak nola lantzen genituen azaldu genizkien. Biolur aurkeztuta, Catalunyan ekoizpenean zein kontsumoan erreferentzialak diren hainbat proiekturekin batera mahai-ingurua partekatu genuen. Ondorengo kolektibo hauek hartu zuten parte: Cooperativa de Consum El Brot, Einateca Agroecològica, Fundació Emprius, La Kosturika i APACAT. CoopCampeko langileak dinamizatu zuen eztabaida eta aurrera begira ditugun erronkak marraztuta, bideak irudikatzen eta proposamenak partekatzen aritu ginen. Kasu honetan, guk Amillubi proiektua azaldu genien. Beraiek erosketa kolektiboez, kolektibo ezberdinen arteko elkarlanez, baserritarren arteko aliantzaz, eta bestelakoez mintzatu ziren. Nola ez, ekimenaren osteko afarian erronketan eta aukeretan sakontzen jarraitu genuen.
Larunbat goizean Camp de Tarragona eskualdean jarraitu genuen, eta Santa Coloma de Queralt herrian okindegia duen L’Aresta Cooperativa bisitatu genuen. Lau lan-lerro ditu l’Arestak: okindegia, dinamizazio agroekologikoa, formakuntza eta hezkuntza, eta ikerketa. Alde batetik, okindegiaren funtzionamendua ezagutu genuen: gehien bat bertako barietateekin egiten dute lan, zonaldeko ekoizle bati irina zuzenean erosita, eta astean labekada bat egiten dute. Bestetik, kooperatibaren barne funtzionamenduaz aritu ginen luze eta zabal. Hemen bezalaxe, ekoizpenaren arloa oso egoera zailean dago, eta proiektuen bideragarritasuna lortzea ez da erraza. Baina saiatu eta saiatu ari dira, eta ikaspen interesgarriak partekatu genituen. Halaber, dinamizazio arlotik, herriko harategiaren eta hiltegi txikiaren erreleboa landu dute, inguruko 4 artzainekin batera, eta proiektuaren gakoak eta irakaspenak azaldu zizkiguten. Azkenik, L’Arestako kide bat Arran de Terra Cooperativako kidea ere bada, eta bigarren honetatik Collserolako mendian urte luzetan zehar egin duten prozesuaren nondik norakoak azaldu zizkigun. Bereziki interesgarri iruditu zitzaigun “Contracte Agrari” figura, zeinaren bidez deritzon zerbitzu ekosistemikoen konpentsazio ekonomikoa lortu eta egituratu duten.
Eta Collserolaz aritu eta gero, zuzen Collserolara joan ginen, La Rural de Collserola proiektua bisitatzera. Lursailean bertan elkartu ginen proiektuko kide batekin, eta proiektuaren bilakaera kontatu zigun. Collserola Bartzelonako area metropolitanoaren erdian dago eta, beraz, merkaturatzeari begira aukera anitz eta emankorrak dituzte. Ez da kasualitatea, beraz, lan handia egitea merkaturatzeari begira. Egun, horri begira antolatzen dute ekoizpena. Beste ikuspegi bat ekarri zigun, eta gureari begira jarri gintuen.
Handik hirira jaitsi ginen, aterpetxera. Bertan elkartu ginen hurrengo egunean, igandean, Coop57eko kideekin. Beraiek eman ziguten azpiegitura, aholkularitza eta babesa diru bilketa kanpainan, eta bagenuen beraiekin elkartzeko eta proiektuaren berri emateko gogoa. Harriduraz hartu genuen, momentuz, egin duten crowfounding kanpaina handienetakoa Amillubikoa zela entzutea. Noski, egindakoaz aritu ginen, baita aurrera begira jarri ere.
Eta aurrera begira jartzeko, asko eta asko dira bidaia honetatik ateratako ideiak, galderak, erronkak eta gogoak. Bidaiari zukua hobeto ateratzeko, kronika zabalago bat egingo dugu hurrengo asteotan, hurrengo hilabetetan Amillubin ditugun erronkei begira irakaspenak ateratzeko. Bidaiaren inguruan informazio gehiago nahi izanez gero, ez egin zalantza eta idatziguzu.
Nork ekoiztuko du etorkizuneko janaria? Galdera horren aterpean ekin diogu Amillubin aurtengo Udaberri Festari. Eta urtaroan sartu berri garen honetan jaiaren kartela partekatzen dizuegu. Oraindik data gorde ez baduzue, gorde dezazuela gogorarazteko, eta bertaratzeko gogoa pizteko.
Aurrerago zabalduko dugu egitaraua, baina aurreratzen dizuegu mota ezberdinetako guneak izango ditugula: mahai-inguruak, umeentzako txokoa, kontzertu eta kultura emanaldiak, jan-edan agroekologikoak. Giro ona denon kontura, eta eguzkia zortearen esku utziko dugu.
Gipuzkoako hamaika txokotatik gerturatutako hamarka lagun elkartu ziren otsailaren 23an Amillubiko lehen auzo(p)lanera. Biolur elkarteak bultzatutako proiektu kolektiboa da Amillubi, agroekologian sakontzeko eta Gipuzkoako etorkizuneko elikadura erronkei heltzeko asmoz Zestoako baserria eta inguruko lurrak erosi dituena. Auzolana eta plana, biak batera proposatu dituzte proiektuaren bultzatzaileek oraingoan. “Auzolanak egin izan ditugu lehenago ere, eta lanak aurreratzeaz gain, Amillubi irekitzeko eta jendeari proiektua ezagutarazteko modu bat ere badira”, azaldu du Marta Barba kideak. Oraingoan, baina, lanera datorrenari beste zerbait eskaintzen saiatu dira, eta eguraldi ederra lagun izan dute.
Etxe gaineko aterpea txukuntzea, barrualdea garbitzea, kiwien egitura zaharrak kentzea… lanik ez da falta Amillubi baserrian, eta horietako asko aurreratzeko aprobetxatu zuten otsaileko hitzordua. “Komun lehorrak egiten hasi ziren batzuk, sasiak desbrozatzen eta zuhaixkak kimatzen aritu ziren beste batzuk, aterpeko itxitura egonkorra egiten ere bai… astindu handia eman zitzaien gauza askori”, azaldu du kideak. Jendearen erantzunarekin oso pozik azaldu dira antolatzaileak, izan ere, 30 lagunetik gora elkartu ziren, eta Gipuzkoa osotik gainera: Goierri, Donostialdea, Urola Kosta, Debagoiena… Aramaioko kideak ere izan ziren.
Ongi egindako lanaren ondotik, mokadua eta eguneko plan proposamena izan zituzten: etxeko hazitegia egiteko tailerra. “Jakintzak partekatzeko espazioa izan zen, nolabait, eta hazien trukea ere egin genuen”, dio Barbak. Lehen aldi horretan tailerra proposatu dute, baina gerora etor daitezke hitzaldiak, emanaldiak edo bestelako ekimenak. “Azkenean, lanarena garrantzitsua da, baina ekintza hauek proiektua zabaltzeko eta komunitatea egiteko helburuz ere bultzatzen dira”, gehitu du. Hemendik udara bitartean, bi hilean behin auzo(p)lanekin segitzea da asmoa. Amillubiren webgunean eta sare sozialen bidez eginen dituzte deialdiak.
Maiatzean udaberriko festa
Baserria eta lurra erosteko diru bilketa kanpainan buru-belarri aritu ziren iaz Amillubiko kideak, eta honezkero kopururaren zati handia eskuratua duten arren, falta dutena lortzea da aurten esku artean duten erronka. Proiektuko kideak gogorarazi du diru bilketarako ohiko bideak zabalik daudela eta webgunearen bidez dohaintzak egin daitezkeela. Alor ekonomikoaz gain, dena den, bestelako egitasmoak ere badituzte agendan. “Esan bezala, auzoplanekin segituko dugu, Kataluniako zenbait proiektu ezagutzeko bisita ere antolatzen ari gara, eta maiatzaren 10ean Amillubiko jaia izanen dugu”, dio. Egun osoko festa prestatzen ari direla aurreratu dute, baina horren berri aurrerago izanen dugu.
Otsailaren 23an lehenengo auzo(p)lana egin genuen Amillubin. Eguzkiak lagunduta, jende mordoa bildu ginen, eta mota askotako lanei ekin genien. Astindu ederra eman genion inguruari eta bide berriak ireki: komun lehorrak egin ahal izateko txokoa atontzen hasi ginen, kiwi zaharren ingurua txukundu, sastrakak desbrozatu eta pilatu, aterpearen itxitura berriztu, zuhaixkak eta bestelako landareak kimatu,…
Eguerdi partean, Amillubiko eta Alekako kideen partetik etxeko hazitegia egiteko tailerra egin genuen eta tomate landareak eraman genituen etxeetara. Segidan, hazi trukea egin genuen eta etxera hazi mota ezberdinak eramateko aukera izan genuen.
Bukatutakoan, mokadua partekatu genuen, eta momentua aprobetxatu genuen primizia moduan maiatzaren 10ean egingo dugun Udaberriko Festaren kartela aurkezteko.
Lurra esnatzen hasi da. Amillubiko kultiboetan nabaria da: garia eta ongarri berdea majo gora egin dute, baba ere indartsu doa, eta mata bajuko ilarra jaiotzen hasi da. Baina eurekin batera nahi ez ditugun bestelako belarrak ere bai. Halaber, maiatzean egingo dugun Udaberriko lanari begira azpiegiturak sortzen eta atontzen ere hasi behar dugu.
Egingo dugu hau dena auzolanean?
Oraingoan, baina, auzo(p)lana proposatzen dizuegu. Aurtengo lehena izango da, eta helburua da lana egiteaz gain, elkarrekin egoteko tartea irekitzea. Oraingoan, tailer batekin egingo dugu. Auzolana eta gero, Alekako kideen laguntzarekin etxerako hazitegia egiteko tailerra egingo dugu. Bide batez, hazitegiak egiteko garaia dela aprobetxatuta, hazien trukaketa egiteko ere baliatu nahi dugu goiza. Ekarri etxean dituzun haziak!
Lurrari eta zeruari euririk ez egiteko eskatu diegu. Halere, kristoren zaparrada ez bada, euriarekin ere aurrera egingo dugu.
Azken asteotan euriak greba pixka bat egin zuela eta, Amillubiko lurretan lantxo batzuk aurreratzeko baliatu izan dugu.
Alde batetik, gari soroan fosforoan aberatsa den harri birrindua duen ongarri batekin ongarriketa egin dugu. Izan ere, garia kumatzen hasia da, eta garai horretan bereziki energia behar du, besteak beste fosforoa. Gurean, aldiz, badakigu fosforoan pobre dagoela lurra. Espero dugu ongarriketarekin landareari behar duen energia eman izana eta indartsu etortzea zereala.
Bestetik, etxe azpiko terrenoan Alekarako haziak ekoitzeko landareak ditugu. Brokoli gehiena loretan dago jada eta etzaten hasia zegoen; beraz, tutorea jarri eta lotu ditugu brokoli landareak. Bestetik, udazkenean erein genuen baba badator, baina falta batzuk egon dira eta, azken hazi batzuk erein ditugu zuloak geratu diren tokietan. Eta babaren ondoan mata bajuko ilarra erein dugu.
Azkenik, hortxe dugu ongarri berdea ere, txukun samar datorrena. Pixka bat gehiago hazten utziko dugu, porru landareak egiteko lurra lantzeko momentua heldu arte.
Badituzu urte berrirako helburuak? Guk bai. Abenduan egin genuen 2025erako plangintza bileran urte osorako helburuak adostu genituen, eta horiek gauzatzeko hemendik eta ekainerako bidea marraztu ere. Horrela gustura ematen zaio hasiera urte berriari!
2025 trantsizio urtea izango da Amillubirentzat, garrantzitsua. Alde batetik, proiektua jaio zenetik izan dugun helburu nagusia bete nahi baitugu. 100.000€ falta zaizkigu erosketarekin amaitzeko eta eraikinaren oinarrizko konponketak egiteko eta hori izango da 2025eko xede nagusia. Beraz, ekimenak ere horri begira definitu ditugu: zabalpena, jaia-topaketa, diru-bilketa kanpaina,… Ez ahaztu gure web-orrian aukera duzula ekarpena egiteko.
Bitartean, baina, Amillubi bizirik nahi dugu, bai lurrak eta bai Amillubiko komunitatea. Horretarako, lurra lantzeko proiektuek aurrera darraite: baba eta ilar hazi eta gari ekoizpena, lurra hobetzeko ongarri berdearen ereiketa eta mineralizazioa… baita lurren drenajea ere.
Lurra lantzeko, Amillubiko inguruak zaintzeko, eta etxea guretzat erabilgarri zein goxo jartzeko, auzolanak egingo ditugu, baina oraingoan, “Auzo(p)lanak” izango dira. Lana egitearekin batera, beste ekimenen baten bueltan elkartu nahi dugu. Bi hilabetetik behin egingo ditugu, udara bitartean; otsailean, apirilean, eta ekainean. Joango gara datak eta planak zehazten!
Baina, esan bezala, trantsizio urte bezala ikusten dugu 2025a, dirua lortzetik etorkizuneko proiektua definitzeko jauzia emateko urtea. Hori, baina, kolektiboki egin nahi dugu, sektore agroekologikoan ditugun behar eta erronkei kolektiboki begiratuta. Amillubiko etorkizuneko proiektua definitzeari begira, beraz, beste esperientziak ezagutzen hasi nahi dugu. Horretarako, hurrengo hilabeteotan, bi ekimen nagusi egingo ditugu. Alde batetik, erreferente zaizkigun hainbat proiektuengana joango gara, bertatik bertara euren esperientziak ezagutzeko. Emango dizuegu horren berri. Beste alde batetik, esperientzia horiek gurera ekarri eta kolektiboki hausnartzeko gunea sortu nahi dugu, eta horretarako 2025eko Udaberriko Festan hausnarketa guneak ere izango ditugu.
Beraz, aurten, berriz ere Udaberriko Festa egingo dugu, maiatzaren 10eko asteburuan, Amillubitar komunitatea elikatzen jarraitzeko. Oraingoan, baina, alderdi ludiko-festiborako uneak egoteaz gain, hausnarketa kolektiborako espazioak ere sortuko ditugu. Gorde data!
Ilusioz ekin nahi diogu bideari, zuek bidelagun. Beraz, animatu ekimenetan parte hartzera. Gu ohiko bideetatik (Telegram kanala, web-orria, facebook eta Instagram-a) informazio zehatzagoa ematen joango gara.
Abenduaren 1ean Amillubin elkartu ginen, proiektua ezagutzera eman genuenetik urtebete igaro dela ospatzeko eta emandako urratsen berri emateko.
Egunari auzolanarekin ekin genion. Ongarri berdea erein, brokoli landareen ingurua atxurtu,… eta ospakizunerako ingurua atondu eta salda beroa prestatu.
Auzolana bukatuta, patxadaz egoteko tartea izan genuen, kafe edo trago bat eskutan,… goizaren xedea taldea eta komunitatea elikatzea ere baitzen. Eta segidan ekitaldiari ekin genion. Libe Goenaga eta Julen Zulaikak bertsotan lagunduta, Amillubiren sorrera eta gaur egunera arteko ibilbidea eta aurrera begirako erronkak izan genituen aipagai. Halaber, Amillubi ez da Amillibia baserrian martxan jartzen den lehenengo proiektua eta ekoizpena eta, beraz, inguru horri lehenago bizitza eman diotenei aipamen eta aitortza eman nahi genien. Baserriko aurreko bizilagunak, Natik, sukalde aurreko ingurunea kuttuna zuen, loreen koloreekin zainduta eta alaituta, eta hala eman nahi izan genion jarraipena guk ere. Baserrian zegoen goldea zaharberritu, eta horren inguruan lore eta bulboak landatu genituen.
Egunari amaiera emateko, jan-edanaren bueltan berriz ere informalki elkartzeko aukera izan genuen, giro ederrean. Pozik, itxi genuen eguna. 40 lagun inguru elkartu ginen, giro onean, eta etorritako guztiei eskertuta joan ginen etxera, goizean zehar egindako lanari esker astindu polita eman baikenion Amillubiko lurrari eta proiektuari.
