Jende pila bat batu ginen agroekologiaren bidean kolektibo handi eta sendoa garela ospatzeko.

Oso pozik gaude bizi izan genuen egunarekin. Lan handia izan da guretzat, eta jendearen erantzunak emozionatu egin gaitu. Eskerrik asko gerturatu zineten guztioi; zuen energiarekin indarra sumatu dugu proiektuan. Bidelagun asko ditugula sentitu dugu, eta egindako bidea jai giroan ospatu behar dugula ere bai.

Goiza mahai-inguruekin hasi genuen. Lehenengoa Ametsek lurra hartzen dutenean izan zen. Hiru proiektu etorri ziren euren esperientziak partekatzera eta amets kolektibo bat aurrera eramateko gakoak eskaintzera. Besteak beste, honako gaiak aipatu ziren: proiektuaren hasierako helburuei eta balioei eustearen garrantzia, norbera aldatzeko prest egotea, auzolanaren indarra, pauso bakoitza ospatzearen beharra eta eztabaidarako metodologia lantzea. Lakabeko Ilargi, Ametxeko Jorge eta Agina biziberritzeko Alazne izan genituen mahai honetako protagonistak.

Bigarren mahai-ingurua Lur bizia, herri bizia izenburupean egin genuen, lehen sektoreko ekoizpen kolektiboetan zentratua. Alekako Kelo, Errigorako Irati eta Etarteko Monika etorri ziren. Proiektu bakoitza zer beharri erantzuteko sortu zen azaldu zuten, izan duten bilakaeraz hitz egin zuten, kolektiboan lan egiteak dakartzan onurak eta irekitzen diren aukera berriak partekatu zituzten, baita bidean sortutako zailtasunei nola heldu dieten ere.

Hau guztia gertatzen zen bitartean, haurrek ere euren txokoa izan zuten: margotzen, jolasean eta gozatzen.

Lakabeko kideak bazkaria prestatzen aritu ziren, inguruko produktu agroekologikoz egindako paella eder batekin.

Bazkalostean, jai giroari eman genion hasiera. Beste urteetan bezala, goiza formakuntza politikorako eta hausnarketarako izan ohi da; arratsaldea, berriz, elkarrekin gozatzeko eta ospatzeko unea.

Alde batetik, haurrek zirku tailerraz gozatu zuten Hazietxe Zirkus konpainiaren eskutik.

Bitartean, Aimar Uribesalgok Pobresiak emanaldiarekin eman zion hasiera arratsaldeari. Ondoren, Eli eta Manex Pagolak bertsoa eta saio elektronikoa uztartu zituzten emanaldian.

Dantza giroan jarraitzeko, Babarrunbak Euskal Herriko musika runba doinuekin eskaini zigun emanaldia. Berba Labanakaz taldearekin, berriz, punky-kuki estiloan saltoka aritu ginen denok.

Amaitzeko, Txantona Garrote DJak dantza, algara eta poztasunez inguratu gintuen.

Nekea eta alaitasuna ditugu gorputzetan. Eskerrik asko boluntario bezala txandak bete zenituztenoi, janari eta edari agroekologikoak ekarri zenituztenoi, eta bertaratu zineten guztioi. Plazer bat izan da guztiekin horrelako egun bat ospatu izana.

Udaberriko festa denok gozatzeko espazio eroso eta aldarrikatzailea izatea nahiko genuke, ingurua zaindu eta errespetatzen dugun bitartean. Hori, baina, ez da berez gertatzen den zerbait, eta beraz, horri begira, hainbat ohar partekatu nahi ditugu guztiekin:

Bazkarirako ticket gutxi batzuk baino ez dira geratzen, beraz, azkar ibili eta ez geratu gabe!

Arratsalderako, aldiz, nahi beste sarrera daude; gainera, azken momentuan animatzen bazarete ere, bertan izango duzue arratsaldeko ticketak erosteko aukera. Zatozte giroaz gozatzera! Bazkarirako eta arratsalderako ticketak hemen.

Eguraldiari begira

Lehenik eta behin, eguraldi-iragarpenak oso aldakor datoz, eta ez dakigu ziur zerekin topatuko garen. Eszenatoki horren aurrean, aterpe ezberdinak prestatzen ari gara Amillubin, jaia bertan egin ahal izateko. Hala ere, horrekin lotuta ohar pare bat partekatu nahi ditugu, denok ahalik eta erosoen egon ahal izateko.

Nahiz eta Amillubin aterpeguneak sortu ditugun eta beraz, bertan ez gara bustiko, gomendatzen dizuegu mendiko botak edo tankerako oinetakoak ekartzea, baita  txubaskero eta/edo euritakoak ere. Oinez etortzeko eskertuko duzue, baita Amillubin sortuko ditugun aterpeguneen artean mugitzeko ere.

Eta euria egingo badu?

Egia esan, ez da eurite handirik espero; gehienez ere xirimiri pixka bat egitea aurreikusten da, eta arratsalde partean atertzera joatea espero dugu. Hala ere, badaezpada ere, B plana prest daukagu eta eguraldiak ez digu festa zapuztuko.

Beraz, animatu lasai etortzera! Edozein aldaketa edo informazio zehatzago webgunean, sare sozialetan eta izena eman dutenei email bidez jakinaraziko diegu.

Mugikortasuna antolatzeari begira

Amillubin aparkatzeko espazioa mugatua da oso. Beraz, Iraeta auzoan dagoen futbol zelaian utzi beharko duzue autoa, eta bertatik oinez gerturatu Amillubiraino. Seinaleak aurkituko dituzue eta Urolako meandroaz gozatzeko aukera izango duzue.

Kotxean lagun asko etorriz gero, nahi izatekotan, kotxez Amillubiko bidegurutzeraino gerturatu ahal zarete (baserriraino jeitsi gabe) eta han lagun gehienak gelditu. Gero, Iraetara aparkatzera joan eta gidaria handik Amillubira oinez etorri beharko da.

Bidea asfaltatu gabeko lurrezko pista da eta ez dago oso baldintza egokietan. Oinez bertaratzeko zailtasunik izanez gero, jakin “lanzadera” zerbitzua eskainiko dugula Iraetara behar duenaren bila joateko. Beharko duzula aurreikusten baduzu, lehenago jarri gurekin harremanetan (info@amillubi.eus // 688 60 53 80).

Halaber, jaia Amillubiko baserriko lurretan izango da, zelaietan batez ere. Beraz, ez dago egokituta mugikortasun mota guztietarako. Horrekin lotuta behar berezirik izanez gero, jarri gurekin harremanetan eta azalduko dizugu hobeto nolakoa den ingurunea, baloratzeko zein aukera dagoen bertaratzeko eta jaian parte hartzeko.

Pertsona guztiak ongi etorriak, jarrera guztiak ez

Amillubi natur- eta nekazal-eremuan dago, beraz, zaindu dezagun! Amillubin bertan ekoizpena martxan jarri dugu aurten eta jaia ereindako soloen ondoan egingo dugu. Hortaz, ingurunearekiko errespetuz jokatzea eskatzen dizuegu. Besteak beste, hautsontziak jarriko ditugu eta horiek erabiltzea eskatu nahi dugu aldez aurretik.

Bestetik, Amillubiko festa bertaratzen garen denontzako espazio aske eta segurua izatea nahi dugu. Horretarako, ardura denona da.

Haurrak ere gonbidatuak

Haurrentzako txokoa egongo da egun osoan zehar. Goizean zaintza zerbitzua egongo da. Bazkalostean Zirku Tailerra, HaziEtxeZirkus-en eskutik. Hortik aurrera, zerbitzua autogestionatuta izango da.

Jan-edan agroekologikoak

Bertako produktu agroekologikoekin osatuko dugu bazkaria eta barrako edariak. Bazkaltzeko aukera begetarianoa eta ez-begetarianoa egongo da. Janariarekin lotuta behar bereziren bat izanez gero, jarri gurekin harremanetan.

Poesia emanaldia, bertso sesio elektronikoa, punk eta runba doinuak, eta DJa izango dira, besteak beste, bertaratzen direnetzako gozagarri. 

Amillubiren III. Udaberriko Festa ate joka da dagoeneko eta aurtengo ekitaldian ere kultur emanaldiek lekua izango dute festara gerturatzen direnen gozamenerako. Aurreko edizioetan bezala, goiz partean agroekologia hizpide izango duten mahai-inguruan egingo dira eta arratsalde parterako lotu dituzte hainbat kultur emanaldi. 

Sarrerak erosi nahi dituenak, ondorengo loturan dauka horretarako aukera: EROSI ZURE SARRERA.

Pasa den larunbatean Biolurren urteko batzar orokorrean elkartu ginen. Zita garrantzitsua da,  Biolurkideak elkartzen gaituen espazio nagusietako bat delako, komunitate izaera sendotzeko, egindako lana ospatzeko, eta etorkizuna elkarrekin irudikatu eta amesteko.

Ez zen ohiko bilera bat izan. 50 lagun inguru bildu ginen Iratxe eta Aitorren etxaldean, Ekain sagardotegian, eta hasieratik sumatu genuen giro berezi bat; agian batzar honetan Mirian Arrizabalagari egindako lanaren eskertza egiteak izan zuen zer ikusia. Elkar agurtu eta hasierako berriketaldiaren ondoren, batzarrari ekin genion.

Lehenengo zatian azken urtean egindako lana errepasatu genuen, elkarteak prestatzen duen bideo eder baten bitartez. Biolurrek dituen harreman sare eta lankidetzak izan dira azpimarra nagusiak, eraikitzen ari den  agroekologia sarea, komunitatea.

Jarraian 2025eko kontuen itxiera, datozen hilabeteetarako egitasmoak eta honi lotutako aurrekontuak aurkeztu genituen.  Azken hilabetetako taldeen dinamikak,  barne lanketa,  eta gobernantzan emandako pausuak azaldu,  eta hauetan sakontzeko beharraz aritu ginen; eraginkortasuna, partehartzea eta antolaketa hobetzeko helburuz.

Ondoren, Amillubiko proiektuen berri eman zen eta abiatu dugun “Utopiak eraikitzen” prozesua azaldu, eta lehen faseari amaiera emateko ariketa egin genuen. Helburua prozesuaren barruan ateratako bi lan ardatz nagusiak aurkeztu eta batzarrean kidegoarekin kontrastatu eta ekarpenak jasotzea izan zen. Lan ardatza hauek; 1) Eskola Agroekologikoa eta 2) baratza eta hazitegiari lotutako erreleboarako test gunea izan dira.

Taldeka banatu eta proposamen horien inguruan hausnartu genuen. Sei taldetan aritu ginen, eta amaieran ondorioak partekatu genituen.

Entzundakoak eta esandakoak ez zitzaizkigun urrunekoak iruditu, orain arte esku artean genituen beharrei erantzuten dien proiektuak direlako, eta beraz ekarpenak jasota, aurrera eramateko moduko proposamentzat onartu ziren. Norabide berean gaudela sentitzeak talde indarra eman zigun eta orain arteko  prozesua berretsiz, proiektuak lurreratu eta lantzeko faseari ekingo diogu.

Eguneko unerik bereziena amaieran etorri zen. Junta berria  aurkeztu genuen giro alaian, eta ondoren Mirian Arrizabalagari  eskertza kolektiboa egin genion. 13 urtez lehendakari izan denari agur beroa eman genion. Une hunkigarria izan zen, eta askori nabaritu zitzaigun.

Amaitzeko, Ekain sagardotegikoek prestatutako jana eta sagardoa dastatu genituen eguna modu atseginean borobilduz.

Biolurren hurrengo topaketa Amillubin izango, maiatzak 16 larunbata Udaberriko festan. Animatu eta etorri!

Datorren maiatzaren 16an, Amillubi baserria eta bere inguruko lurrak biziberrituko ditugu Udaberriko Festarekin. Egun osoko egitarau oparo eta anitza prestatu dugu, goizetik iluntzera arte hausnarketa, elikadura eta kultura uztartuz.

Eguna 9:30ean hasiko dugu ongi etorriarekin, eta segidan bi mahai-inguru eskainiko ditugu, “Lurra oinarri, Utopien bidean” lelopean. Bertan, utopia izatetik errealitate bihurtzen ari diren proiektuak gertutik ezagutzeko aukera izango dugu

14:30ean, Bazkari Agroekologikoak. Etorkizuneko elikadura ekoizpen duin eta jasangarrian oinarritu behar dela sinetsita gaude, eta horregatik tokiko produktu ekologikoak sustatzen jarraitu nahi dugu. Bazkarirako txartelak 10 eurotan jarriko ditugu salgai, eta haurrentzat 7 eurotan.

Bazkalostean, kultur emanaldiak izango dira nagusi. Oholtza gainera igoko dira, besteak beste, Pobresiak, poesia musikatua; Bertso sesio musikatua, Manex eta Eli Pagolaren eskutik; Berba Labanakaz eta Babarrunba musika taldeak eta amaitzeko DJ-ak itxiko dute eguna. Albiste honetan kultur emanaldiei inguruko informazio osatuagoa.

Arratsaldeko emanaldietarako sarrerak ere 10 eurotan eskuragarri jarri ditugu, eta haurrentzat doakoak izango dira. Sarrerak aldez aurretik erostea eskertuko genizueke, antolaketa errazteko. Lotura honetan duzue horretarako aukera: erosi sarrerak.

Egun osoan zehar umeentzako txokoa prest izango dugu: goizean zaintza zerbitzuarekin, eta arratsaldean Hazietxezirkus-eko kideen eskutik zirku tailerrarekin. Albiste honetan kultur emanaldiei inguruko informazio osatuagoa.

Bestalde, jakinarazi nahi dugu ibilgailuak Iraetako futbol zelaiko aparkalekuan utzi beharko direla; handik Amillubira oinezko bidea (5-10 minutu) seinaleztatuta egongo da. Mugikortasun arazoak dituztenentzat, garraio zerbitzua eskainiko dugu.

Horrela, Amillubin komunitatea, lurra eta kultura uztartuko dituen topagunea sortzen jarraitu nahi dugu.

Animatu, eta hartu zuen sarrerak!

Eta jarraitu adi, laster informazio gehiago zabalduko dugu eta.

Urte hasierarekin batera, Amillubi ere berriro martxan jarri da, indarberrituta eta erronka berriei begira. Azpitaldeak dagoeneko lanean hasi dira urteko ildo nagusiak zehazten eta 2026ari begirako planifikazioa osatzen.

Proiektuen lan taldeak Amillubiko lurren antolaketa landu du 2026ko planifikazioa eginez. Une honetan iderra, lihoa, zekalea eta abono berdea ditugu ereinda lursailetan. Lihoa eta iderra erein ostean euri pila bat egin zuen eta ez dira behar bezala atera, beraz, berriz erein behar ditugu hauek. Lurra zaintzea eta etorkizunari begira prestatzea da helburua.

Komunikazio eta gizarteratze taldea ere buru-belarri dabil sormen eta antolaketa lanetan. Iruditegia osatzen ari dira, eta “Eskola Hazien” egitasmoa, Amillubiko festa eta bestelako ekintza irekiak prestatzen. Ekimen hauen lehen urratsak dagoeneko ematen hasi dira, eta Eskola Hazien proiektua martxoan jarriko dugu martxan, hezkuntza eta lurra uztartuz.

Sozioekonomikoko taldea ere ez da geldirik egon. Baserria erosteko prozesuaren azken txanpan gaude, eta une erabakigarri honetan baliabide ekonomikoak nola lortu aztertzen ari dira, alternatibak lantzen eta bide berriak irekiz, proiektuaren etorkizuna bermatzeko asmoz.

Bestalde, Amillubi ezagutzen jarraitzeko interesa gero eta handiagoa da. Larunbat honetan, Getxo ingurutik mintzapraktiketan dabiltzan lagun ugari hurbildu ziren proiektua ezagutzera, lurra, baserria eta proiektuaren filosofia bertatik bertara ezagutzeko aukera izan zuten.

Gaur, berriz, Donostian ekofeminismoari buruzko hitzaldi bat eman dugu +55 taldearentzat, eta datorren astelehenean eta asteartean talde bera Amillubira etorriko da proiektua sakonago ezagutzera.

Poliki baina tinko, Amillubik aurrera egiten jarraitzen du, sareak ehuntzen, lurra lantzen eta komunitatea indartzen.